'Volksfeest 1978'

WINTERSWIJK - Dit jaar wordt er geen volksfeest gevierd. Voor Henk te Bokkel aanleiding om in zijn archief op zoek te gaan naar een gedicht dat hij schreef over het Winterswijkse volksfeest. Hij schreef het gedicht in 1978.

'Volksfeest 1978'
Is t’n optog af e’ lopene
dan geet iedereen zien gang
ie’j heurt dan allemaol verhalen
wat wasse mooi, wat wasse lang.

Groter nog dan an’dre jaoren
jao en blomen wazzen d’r zat
hoo kriegt ze t’altied veur mekare
met ’t weer he’w ook geluk e’ had.

D’n één drunk koffie bie’j zien mooder
un ander geet naor ut café
d’r gaot t’r wat an ’t pierewaaien
maor völle gaot t’r naor ’t C.C.

Daor spölt de muziek nog efkes
déé verdeend un compliment
d’n helen morgen al ‘eblaozene
en ook hier, bunt ze present.

’t Is in de zale slim gemeud’luk
de muziekanten hebbet warm
un kind wil geerne naor de karmis
en trök zien vader an d’n arm.

Maor vader steet nog luk te kletsen
met Hendrik uut ut Harrisveld
maor hee grip zich toch de knippe
en gif d’n kleinen jonge geld.

Op ut feesttrein môj is kommen
waor oe’w heur’n en zeen vergeet
mans’leu in de goeie bôkse
vrouw’leu in ut beste kleed.

Völle mensen kom ie’j teggen
en iedereen zeg goeiendag
en a’j dan zo efkes staot te kieken
schöt ’t oew gewoonweg op t’n lach.

Ne vrouwe van un jaor of zestug
blif effen bie’j ne gok tent staon
dat wil ze ook wal is proberen
ze hef dat mangs nog nooit ‘e daon.

Ut ding begunt noo slim te röt’len
ze stopt t’r nog ne gulden in
en ze wund verduld ne wekker
da’s deksels al un good begin.

Ze grip zich nog is in de tasse
ze wög t’r nog vief gulden an
en ze wund verduld mienale
ook nog ne mooien koffiekan.

Twee blagen staot zik te vergapen
bie’j de snoep en noga kraom
ieder hebt ze maor vief gulden
ze hebt t’r al zo lang é staon.

End’luk koopt ze dan ne zoerstok
en ze kriegt veer vieftig weer
net genôg veur twee keer botsen
en in de mölle nog ne keer.

Ne boer steet efkes nog te kieken
en kög zich dan ne groten wost
ut dinge smek merakels lekker
maor hee krig op ens zo’n dost.

Hee stiefelt langzaam naor Boer Balink
besteld zich daor un gleesken bier
en zut daor Gert en Willem zitten
kriegt met zien dree’jen slim völl plezier.

Samen nog un paar pilsjes drinken
met tussen deur ne goe’jen mop
evven olderwets weer lachen
en zo hebt ze d’r , al achtte op.

Iederene hef zo genoten
klein en groot en jong en old
van d’n optoch en de karmis
zorg da’w dat, in ere holt.

Dank an alle medde warkers
Corso bouwers en muzikanten ’t meest
en veur al ……de burgeriei’je
en ’t bestuur van ’t Volluksfeest.

H.J. te Bokkel
September 1978.