Hulzer willem pasen
Gööre
Noo ut veurjaor an kump steet Berts in de startblökke. Hee mot an'n hof want dat is zien lust en zien leaven. Awwe der langs komt kieke wi'j uns altied de ogen oet. Prachtigen hof. Of eigenlijk mag ut wal tuin heten. Zo as noo in ut veurjaor krioelt ut al van de sneeklökskes en de paoskeblomen. De narcissen. At ut eene nog neet oet e'bleuid is broezet ut andere al wear oet de grond. Prachtig!
En dan as pronkstukke midden in 'n tuin un prachtig gazon. Trouwens wieters rondumme thoes is ok alles eaven glad en mooi. Dat kan ok neet anders. Vrogger hadde ne gewone grösmachine waor hee zich ut zweet met oet de rugge arbeiden maor sunds veurig jaor heffe ne zitmeier. Dat is helemaol ideaal. I'j mei'jt en mei'j 't. Ut gazon wordt mooi glad en i'j lie'd der zelf niks an. Hee is der dan ok neet af te slaone. Elke vief minuten deete ovver hef toert hee met dat dinge rond. Hee zit der nog vaker op as op 't huusken. Alleene maar umme ut gazon zo mooi möggelijk te kriegen. En daor zolle ok zeker in slagen maor sunds korts zit um der eene dwars. Of misschien wal meer, ne gööre! Of misschien praot i'j leu ovver ne weule, of op zien Hollands un mol! Maor wi'j praot ovver ne gööre.
Noo heb dee diers sunds at ut hier krioelt van de emelten un leaven as God in Frankriek. Noo hewwe natuurlijk de keuze tussen ne gööre en dee emelten. Wat dat betreft steet Berts veur 120 % achter dee gööre. Hee gönt ze allemaole een dagelijks diner van doezenden emelten. Maor daor hoof ze noo, pot verhier en gunter mi'j, noo neet speciaal ok zien gazon? veur ovver kop te zetten.
Ovveral buitens in zien gazon van waor buj mi'j...Ut Montferland is der niks bi'j.... En al dee zandbultens bunt ok nog slech veur ziene ni'je grösmaschiene. Hee kan't ok neet helpen maor oet zien gazon moet ze oet blieven. Daor zit niks anders op, zea iedereene, daj un paar klemmen zet. Klemmen zat in de schuure maor wat dee klemmenzetteri'j betreft geet ut Berts net as mi'j. Atte met dee klemmen oet de schuure kump begint ze in de grond al te lachen. Berts halen de klemmen oet de schuure en op un paar stategische punten zetten hee ze too, en iedern morgen genke kieken of ut al wat op e'brach hadde. Maor zoowe al zea'n Berts heurn alleene wat gegrinnik in de grond. Nooit gin resultaat. Noo weet ik neet hoo ut ow geet maor aj argens gin raod met weet dan haal i'j der ne naober bi'j.
Dee weet ovveral raod op. Berts zienen naober ok. Den heelp um vlot. Greep ne klemme, veulen hier en daor is in de grond en zat daor de klemme too. Den andern morgen zatter al ne joekel van ne gööre in. Ne kanus wao'j U teggen zeggen konnen. Deur al dee emelten wazze good oet de kloeten e'komm'ne..
Maor't heelp niks, wan't den andern morgen wazzen der nog nog'n paar buitens bi'j e'komm'ne. Naost ut Monterland laggen noo ok nog den Lochemsen barg en den Hettenheuvel. Ut was umme gek van te worden. Wear'n naober der bi'j e'haald en den hef'm noo precies oet e'leg hoo'j zonne klemme zet. Earste good zeuken nao zonne göörngank. Hier veul i'j um, hier hej"n gank , noo de klemme der iets deeper in zetten zodat de klemme precies veur den gank zit ...Zo....der luk mozzel ummehen en dan wacht i'j moor tot morgen. Dat dee Berts. Hee sleep der 's nachts haoste slechter van. Bi'j dag en dauw vloog hee oet't bedde en dat nao zien gàon en juustement ut ongeleuf'lijke was gebeurt, de klemme zat dichte en ne grote gööre zat der in. Ne joekel, net zonne groten as gistern. Alleene dizze gööre hadden un breefken op de rugge met ut mooie gezegde er op: Vrolijke Paasdagen!